وتوتة توتة خلصت الحدوتة ..... وانتهت المرحلة الانتقالية اللي حددها المجلس العسكري وبعدها تتنقل السلطة للمدنيين بل زادت وادينا تمينا 10 شهور .... 10 شهور كاملة مروا علينا بالطول والعرض ، الحرب والسلم ، اليأس والأمل
وجت اللحظة اللي اتمنيناها من سنين، وهي انتخابات نزيهة تشكل لنا مجلس نيابي محترم يعمل لنا دستور يحقق لنا العدالة اللي عايزينها ويوصلنا لجو نضيف ونبدأ نجني رخاءك يا مصر .....لما جه توقيت الانتخابات مع احداث نوفمبر (او العكس) وتباينت المواقف ،، كنت انا من الناس اللي بدأت تفكر ما تنزلش اعتراضا وأخيرا استقريت على اني مش سيباهالهم أبدا أبدا ....* في طريقي للجنة قابلتني سيدة أربعينية رائعة الجمال والهدوء، قالت لي أنها أول مرة تنتخب وانها هتختار لما تشوف الورقة وفيها كل الاسماء وبعد كده عرفت أنها مش متعلمة .. ولما سألتها نزلتي ليه؟ قالت لي "" عايزة أغير حياتي"" * قدام اللجنة وأنا لسه نازلة من التاكسي لقفتني مندوبة النور وبدأت تحفظني رمز النور ولما لقت ناخبة تانية بتوصل أرض المعركة جريت عليها وسابتنيفشدتني مندوبة الحرية والعدالة وقالت لي صدقيني الأخوان هم الأصلح عندهم خبرة بالسياسة ومش بنكدب زي النور طب حتى شوفي احنا واقفين هاديين ازاي؟ * ببص كده لقيت ست بسيطة داخلة بتسأل تعمل ايه جوا اللجنة فبدأت البنت تشرح لها وتحفظها الرمز على نموذج لورقة التصويت ،، فقلت لها : افرضي هي مش عايزة الحرية والعدالة !!ردت عليا الست بكل ثقة :"" لاااااااااااا .......... مش عايزة النور " * استهديت بالله وقلت أدخل لجنتي ، وأنا على السلم خدتني ست على غرة فاتخضيت واتكعبلت . كانت بتدلل على جوزها المرشح الفردي المستقل ولما لقتني مش عارفاه ... قالت لي ده فلان كان حزب وطني " أد الدنيا " وياما خدم ناس دايرته وبيشتغل سياسة من قبل الثورة !!!! * استهديت بالله تاني وقلت ألحق احط صوتي ودخلت ورا الستارة وخلصت وكانت جنبي ست وطولت الحقيقة، لما خرجت قال لي الموظف " برجاء " ساعديها ، فدخلت لها لقيتها بتدور على اسماء ورموز 2 مرشحين وريتهم لها ، وفي ورقة القايمة قالت لي اختاري أنتي ولما صممت أنها تختار بنفسها قالت لي " أنا اختارت 2 كفاية عليا اختاري أنتي التالته " * حبيت أخرج وأروح بيتي بسرعة .... قدام اللجنة وقفتني نفس مندوبة النور المنتقبة واللي عرفتها من صوتها قالت لي " كده برضه يا أختي تسيبيني وتروحي لبتوع الحرية والعدالة أنا : ما أنتي اللي سبتيني ومشيتيالمندوبة : تقومي تختاري الحرية والعدالة .... دا النور بيدعمه كبار مشايخنا زي محمد حسان والحوينيأنا :اطمني ما اختارتش الحرية والعدالةالمندوبة : بجد !!.....اممم شكلك اختارتي حاجة غير النور برضهأنا : ........................المندوبة : أوباااا ..... اوعي تكوني اختارتي الوفد ،، يا تختاري النور يا تختاري الحرية والعدالة .. أهو كلهم اسلامأنا :!!!!!!!! والوفد مالهم يعني ؟المندوبة: تبقى اختارتيهم ...... كده برضه L غلطانة غلطانة Lأنا : ياستي والله ما اختارتهم .. بس مالهم الوفد يعني؟المندوبة: ليبراليين يا أختي ..... عارفة يعني ايه ليبراليين .... عايزة تختاري ليبراليين ... ربنا يعافينا ويعافي البلد.... دا احنا بنقول بسم الله .... ربنا يعافيناوهنا وقفت أول توك توك وجري على بيتي وأنا باصة في الأرض مش عايزة اتكلم مع حد ودخلت بيتي رميت شنطتي وأخدت بناتي في حضني ...!!!!!
